中國喺邊一年入世貿？去年奧運，邊位運動員負責聖火傳送嘅第一棒？喺一個國民知識水平測試嘅比賽上，I.T.界立法會議員譚偉豪及骨科名醫高永文「露晒底」，答錯唔少題目，認真老貓燒鬚。
話說I.T.豪及高醫生分屬兩隊，同小學生及台下市民鬥快搶答問題，可惜I.T.豪答錯中國加入世貿年份，高醫生亦搞唔清中國係邊一年申辦奧運成功，又記唔起聖火傳送嘅第一棒係蛙后羅雪娟，最後兩人都輸咗比賽，齊齊冇獎攞。
高醫生話，輸贏唔緊要，旨在參與就得嘞。查實佢對中國民情好了解，七月尾將再度到訪四川，佢話當地災後重建進度神速，可惜受傷災民多不勝數，唔少災民至今仍未裝上義肢，部分受傷小童因為骨骼長得快，幾個月就等住換上新義肢，所以高醫生要密密飛四川，當正四川係佢第二個家。