行頭一向樸素嘅經濟動力成員梁劉柔芬（Sophie），前日罕有地出動百萬私伙遊艇參觀正生書院，富婆身份盡曝光。蘇菲梁話，艘遊艇係廿年前買落，專供老公梁孔德及囝囝出海玩樂，甚少招呼街外人，今次「私竇」曝光，未知會否引來好友問佢借船出海呢？
蘇菲梁艘遊艇雖然款式較舊，但麻雀雖小五臟俱全，艘船雖然唔算大，但接載十個人都仍覺寬敞舒適，開枱攻打四方城都無問題，設施更是一應俱全，廁所、廚房、雪櫃樣樣都齊晒，仲放得落一張三座位嘅梳化及一張上下格床。
艘船係梁孔德嘅「行宮」，佢閒來最愛出海釣魚，順便帶埋太太及仔女出海吹吹風，不知幾爽。可惜自從蘇菲梁做咗議員後忙到飛起，一家人已甚少出海，今次載班議員到訪芝麻灣正生書院，終於大派用場。
探訪完正生後，蘇菲梁又透露另一大計，佢計劃緊出版成人食譜。月前佢出書教人烹調幼兒美食大收旺場，今次再下一城專攻成人口味，介紹簡單又健康嘅食譜，不過本書仍在籌劃當中，出書日期未定，大家拭目以待喇。