尋日出席城市論壇嘅，除金勞詹之外，另外三位嘉賓都係泛民嘅學者、立法會議員同民陣召集人，台下仲有成班「紅衫軍」叫陣。金勞詹一句「七一」七萬幾人上街，相對全港七百萬人只係小數目，旋即遭台上台下圍攻，終於節目第三節未完，潮州怒漢火山爆發，佢話：「你哋要對抗，對唔住，我離席，我無謂同你哋講嘢。」跟住起身走人，主持人急急挽留，阿詹行咗幾步，折返攞咪拋低一句：「我點解要嘥時間，喺度浪費我嘅精神呀？對唔住！」跟住拂袖而去。

批港台唔中立

潮州怒漢步出論壇後，餘怒未消，批評港台唔中立，偏幫泛民，剝奪佢嘅發言自由。主持人解釋，本來有邀請民建聯同自由黨，不過只得詹議員肯嚟，港台梗係無任歡迎啦。原來潮州怒漢做咗代罪羔羊。