我哋早前踢爆立法會同屯門區議會喺今年三月舉行定期會面時，多名本身來自新界西嘅立會議員集體甩底，最後只得四人現身，令到與會嗰十九名區議員非常火滾，質疑立法會唔尊重佢哋。事隔三個幾月，立法會又爆出同類醜聞，有九龍城區議員投訴，話多名來自九龍西嘅立法會議員喺同佢哋會面時集體遲到，包括本身係會議召集人嘅民協馮檢基，最終要來自飲食界嘅自由黨張宇人臨時頂上代做召集人受靶，真係失禮。

召集人馮檢基遲35分鐘

該次會面原定喺上星期四上午十時四十五分舉行，事前有九名立會議員報咗名，但到夠鐘開會時只見肥仔張一人。之後秘書處職員收到阿基電話，話自己肯定會遲大到，叫其他到咗嘅議員代佢主持住個會先。肥仔張見對方有成十幾名區議員，自己以一敵眾非常難睇，決定採取拖字訣，同區議員東拉西扯，希望等多兩三位同事趕到先正式開會。

二十分鐘過去，只有代表旅遊界嘅議員謝偉俊蒲頭，兩人惟有硬着頭皮宣布開會，對方雖然冇即場開口表達不滿，但難免有部分人面都黑埋。到接近十一時二十分，即喺原定開會時間足足七個字之後，首名九西議員阿基先至趕到，之後先見另一九西議員民主黨嘅涂謹申。

本身都係九龍城區議員嘅九西立法會議員梁美芬仲離譜，到接近十二點半散會前幾分鐘先趕到，仲反過來叫大家唔好食飯住，等佢發表埋兩分鐘偉論先，令眾同僚更火滾！至於另外兩名九西議員一早告咗假，唔算臨場甩底。

阿基事後解釋，佢因為喺前一日七一遊行行到腳抽筋，先會遲咗出門口，不過已經即場向區議員同肥仔張致歉。阿涂就話自己當日同時獲安排喺花旗銀行大廈嗰邊嘅立法會申訴部，處理一宗申訴部個案，投訴人仲咁啱都係九龍城居民，佢同街坊開開吓會收到秘書處急call，先至急急趕返落立法會大樓。梁美芬就話當日咁啱係佢囝囝小學畢業，所以先至遲到。不過今次會面其實早喺三四個月前就安排好，點解啲議員唔識預先請定假嘅咩？