有時裝品牌近日為今年秋冬服裝廣告招聘兩名青年男女，聲言會花費一百萬元為受聘青少年裝身及拍廣告，吸引城中少男少女應徵。卓妮尋日撞見有招募人員喺銅鑼灣駱克道派宣傳單張，大會更派出攝影師喺街頭狩獵對象。

賭王實鬧 三太唔畀

晏晝兩點左右，身穿迷你短裙嘅超蓮同朋友喺崇光一帶購物，招募人員見有靚女經過，一個箭步標前舉機影相，超蓮對鏡頭唔閃避，企定定任影唔嬲，卓妮上前問佢係咪有意應徵做模特兒，超蓮甜笑話：「有啲興趣，但要返屋企問過媽咪先。」超蓮仲話，自知工作經驗有限，想搵暑期工都難，計劃喺媽媽開設嘅地產公司做實習生，暑假後再返英國升學。

超蓮有意加入「靚模」行列，不過三太嘅回應斬釘截鐵，佢透過秘書Sandy即時Say No：「超蓮咁細個，未讀完書，爸爸一定鬧，何太亦唔會畀。」佢話若然超蓮先斬後奏去試鏡，個廣告拍咗都無可能出街。三太家教咁嚴，睇怕超蓮都係疊埋心水讀書吧喇！

卓妮