莎姐唔做議員之後，不知幾輕鬆，細女智琪啱啱生咗個大眼孫女都未滿月，莎姐尋日又宣布喜訊，話大女智美喺十一月又生第二胎，數數手指，莎姐咪即係一年抱兩個孫、三年抱三個孫？莎姐兩個女每人生咗一個女，如果智美今次呢胎係男仔，一家人一定更開心嘞。

莎姐以往係女強人，自己甚少落手落腳湊女，依家湊孫，當然唔算熟手，佢自爆話前排佢以為個孫女好曳成日喊，點知原來係乖孫肚餓，真係烏龍婆婆！

金刀梁夫婦睇病談情

同場仲有金刀梁梁智鴻同太太，佢哋兩夫婦都係醫生，平時兩人會互相睇病聯絡感情。唔知佢同屋企人睇病，會唔會特別緊張呢？一向認真嘅金刀梁就話，佢好着緊每個病人嘅情況，個個症都會好緊張㗎！

介紹陳振聰畀政界人士認識，令陳振聰有機會認識小甜甜龔如心嘅王麗明話，佢已經將金象苑嘅生意交咗畀人經營，佢依家主要係經常到處旅行，今次返香港除咗幫老友撐場，仲要處理一啲私務。佢啲私務同陳振聰有無關係呢？一提呢個名，王麗明就笑笑口，話唔再講嘞。

卓妮