政務司司長以出外考察為名，玩到下個星期一才返港，撞啱教育局局長孫明揚星期一驛馬星動，訪問新加坡，政制及內地事務局局長林瑞麟又離港，造就保安局局長李少光有機會署任政務司司長，過番一日CS癮。
憲報尋日公布，光哥下周一署任政務司司長。按官場論資排輩傳統，過往都係由孫公或者林D9署任CS，印象中，光哥甚少署任CS，今次有機會再過一過特區「冧巴吐」癮，真係要多謝孫公。
因為過去經常署任CS嘅孫公，咁啱後日啟程去新加坡訪問三日，同世界各地教育部門首長同業界領袖交流，CS個位又要搵替工。按局長年資計，孫公唔喺度，應該由「林D9」林瑞麟頂上，咁啱林D9又去咗成都，於是造就光哥「紮職」。
據聞光哥今次係第二次過CS癮，對上嗰次喺去年七月，當時又係遇啱高官們齊齊去四川商討災後重建。光哥咁耐冇發市，難得過番一次CS癮，唔知佢會唔會特別記得呢一日呢？