大小睇胸襟

俗語話口大食四方，相書更話口大嘅人特別有口福，咁口細嘅係咪乜都食唔到呢？其實又唔係，一般嚟講，口大嘅女性心胸比較廣闊，敢於接受任何挑戰，而且特別活躍，加上能力同頭腦出眾，事業容易取得成功。

至於把口比較細嘅女士，佢哋屬於依賴型，有啲千金小姐嘅特質，所以外形特別優雅，品味高尚，物慾要求唔多，但要精緻。做事亦冇咁有魄力，思想比較保守。有小聰明，靠呢點聰明，可以喺事業上創出唔錯嘅成績，貴人運會特別好。

所以無論大口定係細口，都有佢本身嘅優點同缺點，只要按所長好好發揮，將缺點改正，就唔難喺事業上闖出一片天，但無論大小，把口都一定要生得正，唔好歪埋一面，否則人際關係會大受影響，最後變得孤芳自賞，奮鬥多年也會一事無成。

厚薄看性情

第二方面要睇口唇嘅厚薄，如果上下唇都比較肥厚嘅女士，內心感情豐富，為人忠厚，好講信用，為人處事十分圓滑，畀人一種穩重可靠嘅樣子，所以深得朋友嘅支持，而且異性更會覺得你特別性感，喺各方面都伸出援手，貴人運認真爆晒燈。

至於嘴唇薄嘅女士，就會畀人一份柔弱、欠缺自信嘅感覺，就算本身信心十足，但畀人嘅感覺都會較差，而且特別鍾意講嘢，容易得罪人唔知道，亦因為人際關唔好，所以為人比較自私自利，唔講乜嘢義氣同人情味，形成助力較少，難取得成功。

但唇薄嘅女士又唔使擔心，今時今日，靠把口嘅工作實在太多，而且唔使吓吓講嘢溫文爾雅，例如一啲清談節目嘅主持，窒人唔使本一樣大受歡迎，另外一啲評論家同埋律師，大多數係嘴唇薄一薄嘅，所以只要揀啱工作，一樣可以有發揮嘅機會。

緊閉測成功

最後要睇把口喺正常嘅情況時，係合埋定係鬆開嘅。據相書講，嘴唇緊閉嘅人比較謹慎，有責任感，意志力強，反應敏捷，最重要是器量十足，一個有容人之量嘅人，自然得到好多嘅支持同愛戴，喺事業上就算有波折，都可以輕易面對，能屈能伸。

至於成日鬆開口唇露出牙齒，最直接嘅印象就係守唔到秘密，好多囡囡都會喺咁，性格上比較懶散，唔願承擔重責，做事唔上心，效率好低，反應遲鈍，意志力仲好薄弱，而且十分無耐性，做事遇上挫折，一定會半途而廢，想事業成功真係好難。但好多囡囡都有咁嘅習慣，奉勸大家真係要小心，如果因為牙齒嘅問題，不妨去箍牙，如果唔關牙齒嘅事，咁就要認真改善呢個習慣，當你經常諗住要小心外露嘅時候，你自然會警惕埋自己，改善啲唔好嘅性格，最後喺事業上一定會取得成功。

撰文：小德