○三年廿三條擱置當晚，政府總部風起雲湧，傳媒湧至採訪請辭財爺嘅梁錦松，連阿松架車都踩凹埋，行政署於是收緊記者出入限制至今，成為特區劣政；估唔到六年之後，呢種限制自由風氣繼續蔓延。職工盟李卓人尋日踢爆，政府總部近日推出種種不尋常措施，直情連議員助理同市民出入政府總部嘅自由，都剝奪埋。

開放入口講大話

「氣候逃犯」事件發生喺六月廿三日，六日之後即係廿九日，立法會議員收到秘書處通知，中區政府合署西座訪客停車場，將會喺七月一日關閉，配合當日遊行活動，而雪廠街嘅入口，就會如常開放。不過，事實證明，政府言不符實，七一當晚八點左右，有議員辦事處職員攞住政府總部通行證想入西座大樓，遭到保安阻止，而大樓裏面嘅人，亦半步不能離開，形同切斷政府總部之路。

政府突然收緊保安，民主黨李永達收到助理求助電話，向保安櫃台查問，竟然係行政署指令，任何人均不能出入西座大樓，同之前話雪廠街入口如常開放嘅論調，明顯有出入。直到夜晚九點，高達嘅助理趁保安開門畀行政署署長麥綺明離開西座大樓，先至乘機破門而入，有通行證嘅議員助理都狼狽，其他市民被留難，更加唔使講。

阿人篤爆，最近公眾人士要進入西座大樓簡直困難重重，以前寫低姓名同來訪目的就搞掂，入大樓前往立法會議員辦事處，與議員或職員見面，點知近日麻煩得多，要填埋身份證號碼同電話號碼等私隱資料。七月二日，民主黨甘乃威嘅職員就突然收到保安電話，指根據行政署指令，議員有訪客，職員須親自到保安櫃枱接人，一睇就知措施係衝着「氣候逃犯」事件而來啦。所以阿人已去信要求立法會行管會邀請麥綺明出席十六日會議，就事件作出解釋。

其實，環保團體偷入政府西座掛「氣候逃犯」通緝令，係就係剃咗政府眼眉，但政治人物如果夠胸襟、有氣量，應該虛懷納諫，而非好似防範恐襲咁阻攔示威者入政府總部範圍，斬腳趾避沙蟲，逃避現實，正正就係逃犯表現囉！