政商界名人圈中臥虎藏龍，搵錢叻之外，唔少人仲係運動健將，好似香港廠商會會長尹德勝，原來係乒乓高手，曾經喺公開賽勇奪冠軍，早前佢帶隊訪京時，巧遇已退役嘅乒壇大姐大王楠，尹會長趁機捉住王楠合照兼請教打波心得，成功融化外表冷酷嘅王楠，尹會長仲約定對方，下次齊齊喺北京切磋球技，磋番兩板喎。
尹會長日前約埋卓妮去中華游樂會「露兩手」，年逾六十嘅佢使出「絕招」連環快速抽波，每下擊球都打到嘭嘭聲，令卓妮大開眼界。原來佢當年讀慈幼小學時已經係乒乓球校隊成員，長大後留學美國，亦主動同其他亞洲學生合組乒乓球隊，可惜返到香港營商後忙於搵真銀，嗜好都擺埋一邊。
公開比賽奪冠
直至十年前某日突然感到身形發福，急需做運動減肥，於是柴娃娃約埋身邊班老友打乒乓波，從此一打上癮，打遍全港大小「波場」，由西環乃至灣仔、北角、西灣河以至何文田室內體育中心，都有佢嘅蹤影。尹會長笑言，自己係無師自通，冇專登請乒乓教練操波，練波秘訣係將唔同波友當成老師，每星期以波會友，出一身汗後齊齊食飯吹水，瞓醒過來，人都輕鬆晒。
八年前，佢更將嗜好當成爭勝目標，參加中華游樂會乒乓球賽，仲奪得男子組亞軍，隨後亦兩度喺香港扶輪社主辦嘅乒乓賽（五十歲以上組別）中攞到冠軍，所以家中已擺放唔少威水獎盃。可惜近年忙於廠商會工作，連打波都冇時間。
最愛馬琳王皓
直至今年六月初喺北京巧遇偶像王楠，又再激起佢練波嘅興趣。不過講到佢心目中嘅超級偶像，原來係當今炙手可熱嘅奧運金牌得主馬琳及王皓，卓妮問佢有冇加入「追星」一族，佢話至今未攞到兩人嘅簽名，反而多年前去外國睇過乒乓球公開賽，變身「小粉絲」向中國孔令輝及南韓金擇洙索簽名。佢又珍藏五、六塊專業球板，所以用咗近七年依然唔捨得丟，貪佢有晒手汗味兼啱晒手形，分外親切喎！
卓妮