特區高官冇乜嘢叻，最叻就係做騷，經濟唔掂做「消費騷」、財政預算案廢到嘔就做「漫畫騷」，豬流感肆虐做乜好呢？唔通真係落手落腳去搞好防疫工作咩，梗係做「清潔騷」啦！

高官行行企企吹水做清潔騷，好多人都見識過，不如今次睇吓食環署前線員工又點樣演出呢場清潔騷吖嗱。

話說有區議員親眼睇住兩名食環署外判工人喺天橋清潔消毒，一個拎住塊布同消毒藥水，另一個就拎住部相機。恕功夫茶孤陋寡聞，布同埋消毒藥水就話可以用嚟清潔啫，唔通相機除咗用嚟影相之外，亦可以殺菌消毒？

咁就梗係唔係啦，原來拎相機嘅工人唔使做清潔工作，佢只不過係攝影師，專門影低另一個清潔工人裝模作樣抹「一呎位」嘅一刻，影完之後，拍拍屁股又趕去第二笪地方繼續影「到此一遊」相片，有相為證，向上級交差就當做咗嘢。

其實又唔怪得佢哋，食環署將清潔外判晒出去就闊佬懶理，喺冇監冇管嘅情況下，外判工人做嘢梗係手軟腳軟啦。

最搞笑嘅係，原來連食環署署長卓永興都話親眼見過有三個工人洗街，淨係做吓樣揸住條喉周圍射，有巡查職員到場時先拎起掃把擦地。卓永興仲好意思死撐話任何機構都有員工表現冇咁好，認為個別事件應個別處理，唔能夠一竹篙打一船人。

算罷啦，食環署向來係出晒名嘅蛇竇，連署長都覺得冇問題，下邊嘅員工仲唔蛇得就蛇咩。不過正所謂上樑不正下樑歪，要數盤據喺上樑嘅最大一條懶蛇，當然非周一嶽莫屬，佢把口就講到天下無敵，話要搞好豬流感緩疫喎，查實防疫措施做騷咁做，根本係形同虛設！

呢嗱，有一名歲半嘅細路女喺上個月底持續發燒，而且出現腹瀉、嘔吐、流鼻水及咳嗽等徵狀，喺豬流感肆虐嘅今日，唔驚有鬼，屋企人於是立即帶佢到明愛醫院急症室求診。點知分流站護士竟然話病人體溫未達攝氏三十九度高燒水平，加上唔係經由救護車送院，打死都唔肯即時診治。

後來病人家屬忍無可忍，索性轉向私家醫院求醫，雖然最終只係確診患上腸胃炎，之但係發燒可大可小，萬一證實係豬流感，一個唔好彩，容乜易將病菌傳播開去呀？

事實上，自本港出現首例本土感染豬流感個案後，疫情一發不可收拾，家陣幾乎每日都有幾十宗病例，尋日甚至錄到破紀錄嘅九十宗感染個案添，班高官仲好意思叫小市民唔好恐慌。講就易呀，最弊係有呢班懶官把關，防疫工作得啖笑，再咁落去，香港遲早一鑊熟，唔恐慌至奇呀！