香港青聯換屆之後，八名副主席中嘅富豪第二、三代，除咗原有嘅「彤叔」鄭裕彤孫兒鄭志剛同觀瀾湖太子爺朱鼎健等外，又多一個霍啟剛，仲有莊士集團主席莊紹綏兒子莊家彬做副司庫。香港青聯係港人進入全國青聯嘅跳板，而且慣例分配到兩個全國青聯副主席位置，以前霍家第二代霍震寰做過，依家係前全國人大常委曾憲梓兒子曾智雄同全國政協委員黃英豪。啟剛本身已經係菁英會副主席，再升任埋香港青聯副主席，睇嚟佢嘅政治視野同家族生意一樣，唔只局限香港喎。

范太兒子范駿華以前曝光唔多，近年開始喺青年團體露頭角，加入「四叔」李兆基大兒子李家傑牽頭成立嘅百仁基金，前晚再擔任香港青聯副秘書長，范太係全國人大常委，范駿華如果要向政途出發，不愁資本吖！