阿Ann同Starry尋日帶埋三十個黨友，一齊去紅十字會位於中環嘅捐血中心捐血，事緣兩個星期前，佢哋嘅黨友沙田區區議員葛珮帆知道紅十字會嘅血庫唔夠Ｏ型血用，於是約埋大家集體捐血。

未捐過血嘅阿Ann尋日顯得有啲緊張，因為今次係佢咁大個人嘅第一次。佢仲笑笑口話，Ｏ型血嘅人開朗樂天，今日嬲完第二日就無事，同性格比較謹慎、固執嘅Ａ型血老公好襯，就算兩人有拗撬都好快唔記得。

有豐富經驗嘅Starry由讀書時代已經開始捐血，佢憶述第一次去捐時唔敢話畀媽咪知，事關佢本身血壓低。至於發起呢次集體捐血嘅葛珮帆反而無捐，佢話自己食咗廿三年素，一樣係血壓低，醫生都勸佢唔好捐，不過佢打算同紅十字會合作，搞搞落區募捐血液，都算係幫吓手啦！