香港茅台之友協會尋晚喺會展筵開三十幾圍，慶祝成立八周年，政商圈中飲得之人紛紛現身比試酒量，要數城中最飲得之一，原來係茅台協會監事長楊孫西，社團中人一致封佢為「酒聖」；佢嘅福建結拜兄弟、茅台會名譽會長盧文端亦有「朵」，被封為「酒仙」；立法會議員黃宜弘（I.Q.博士）就係議會內嘅「酒王」，佢誇口話，就算一晚飲一斤茅台都難佢唔倒喎。
施榮忻佳釀家裏藏
咁熱鬧嘅場面，又點少得卓妮。卓妮尋晚捉住班名人交流飲茅台心得。有份籌辦晚宴嘅菁英會主席施榮忻（Jaime）話，茅台近年身價飆升，當中以「八十年茅台」最值錢，八年前每支才賣萬五，近年身價攀升至八至十萬元；佢屋企珍藏了三、四十支，如今變成家傳之寶。楊孫西都有收藏八十年茅台佳釀，但藏量有幾豐富，佢就唔講嘞；對於被封「酒聖」，佢話唔敢當，自己試過醉到連之前一晚做過乜都唔記得。盧文端就謙稱酒量淺，近年鍾意飲紅酒多過茅台，但家中珍藏幾支八十年極品茅台，點捨得割價出讓。
上等茅台有錢買唔到，尋晚大會罕有地訂咗一百支「五十年茅台」及一百支「十一年茅台」任飲，I.Q.博士唔貴唔飲，攞住支「五十年茅台」四圍敬酒，飲到酒酣耳熱之際，索性連西裝都除埋。
咪以為飲茅台係「老餅叔叔」嘅玩意，尋晚唔少名人二代亦有撐場，全國人大常委范徐麗泰公子范駿華、金利來太子爺曾智明、莊氏集團太子爺莊家彬、理文造紙太子爺李文俊都賞面嚟飲番杯，家彬個緋聞女友傅明憲都靜雞雞出現，但兩人似有意避開對方，唔肯合照；楊孫西公子楊華勇都有幫手搞晚宴，同Jaime周圍招呼客人。
黎瑞恩杜拜避豬疫
曾智明（Ricky）無意中說漏嘴，原來佢避豬流感有妙方，一早安排太太黎瑞恩及一對仔女前往杜拜棕櫚島歎世界，佢話當地租別墅平到笑，超豪單位只係月租港紙萬六蚊，仲送埋十張打高球嘅入場券，佢好豪氣一租就租咗半年，盛惠九萬六，佢話仔女過去放暑假，又可避豬流感，乜都抵番晒。Ricky本來諗住聽日飛去當地會合家人，點知突然收到廣東社團急召，話拉埋佢聽日去廣東考察，見省嘅領導人，結果佢臨時放老婆仔女飛機。
卓妮