長者醫療券計劃自今年一月推行以來，至五月底，約六十六萬個合資格長者中，只有九萬六千人用過，即不足一成半。周一鑊呢條屎橋搞到醫生病人都牙痛咁聲，秉承政府派糖派到見唔到糖兼天怒人怨嘅傳統，政府的管治有幾叻，可謂見微知著矣！該計劃為七十歲或以上嘅長者提供五張面值五十元之醫療券，即係二百五十元，剝隻牙都唔夠，卻要折騰到你爆血管為止。
把簡單的政策複雜化，這是哪門子的管理學？其實，那五張醫療券只要變成去超市購物的禮券般，用時交給參與計劃的醫務所，醫務所匯集後再向庫房兌換即可。呢個世界，唔係樣樣都要用電腦嘅，精簡政策，係要用人腦！
有位前輩話，佢日常批評人用得最多的一句話是「愚蠢」（譯成英文：Stupid）。把Stupid逐個字母拆開，Ｓ指「迷信」（Superstition）；Ｔ是「禁忌」（Taboo）；Ｕ是「極端」（Ultra）；Ｐ是「偏見」（Prejudice）；Ｉ是「無知」（Ignorance）；Ｄ是「拒絕接受事實」（Denial）。
周一鑊如此推行長者醫療券計劃，STUPID之至，六個字母中晒。要言之，佢迷信自己派錢畀老人家，老人家就必定受益。你又不是風水師，信口開河鬼扯一通，老人家就個個老當益壯，一張醫療券都用不着。至於禁忌，愈愚蠢的人，不能碰的禁忌愈多，醫療融資禁忌多多，「掌握健康掌握人生」就係避免去公立醫院求診，一句「你唔好彩咯」，令你以為去咗閻王殿。
歷史告訴我們：凡走極端路線的人不會成功，政策推不下去不顧民意，那不是Stupid是甚麼？把自己的迷信當信仰，把別人的信仰當迷信，這是典型的偏見。
眼見長者醫療券計劃唔多Work，還拒絕接受事實。計劃並不是一條船，不會船到橋頭自然直。唔掂？咁就即刻改喇！