臻美黃乾亨小學暨初中學校嘅辦學權爭奪戰進入最後階段，有興趣接辦嘅辦學團體好似有四十多年辦學歷史嘅香港靈糧堂，都有推介自己嘅優點，而立法會議員林大輝創辦嘅林大輝慈善基金亦承諾願意投放一千萬搞好間學校。
林大輝尋日搵埋林大輝中學校長吳奇壎同校董楊國榮與傳媒茶敍造勢，佢承諾會豪擲一千萬元接辦臻美，比全新開辦一間小學所需嘅七百萬元，多出接近一半。
大輝又強調自己由○二年開始申辦中學時，已諗住要一條龍搞埋小學，絕非一時興起，依家唔少人形容臻美係爛尾樓，佢反而當係天作之合嘅寶物。
至於喺上世紀五十年代成立、現時已有多間幼稚園、小學同中學嘅靈糧堂，sell嘅不僅係優質基督教教育，有一班有心人已經答應成為校董會成員，有心人包括立法會議員石禮謙、陳茂波、公職王陳智思、法官楊振權同前港姐張瑪莉等，仲話有啲臻美學生嘅家長，都話好希望靈糧堂接辦間學校添。
表示有興趣接辦學校嘅辦學團體共有廿五個，呢幾日就會收到有關方面面試嘅通知，有得面試嘅，即係有機喇。