已故華懋集團主席龔如心千億遺產爭奪案審到如火如荼，主角之一陳振聰成為傳媒追蹤人物，尋日陳振聰趁法庭中午休庭，去港島香格里拉酒店醫肚，我哋尾隨而至，發現有意外收穫，揭發「新界王」劉皇發同發展局局長林鄭月娥嘅行蹤，原來佢哋尋日亦相約香格食飯傾偈。
下午兩點鐘左右，陳振聰喺香格醫飽肚，喺保鏢簇擁下行出嚟，當時香格門口企咗一男一女，對呢位近期日日上新聞紙嘅爭議性人物，視若無睹，男嘅掛住打電話叫車，女嘅塊面擰埋一邊。咦，佢哋咪係發叔同娥姐！兩個人去香格搞乜？
發叔同我哋話，約咗娥姐食西餐，佢話自己係立法會發展事務委員會主席，娥姐就係發展局局長，好多嘢都要交流吓意見，所以佢同娥姐有飯局，平常不過啦！發叔仲講，立法會上午討論關於正生書院嘅休會辯論，佢聽咗幾位同僚發言，自己亦發過言，先至同娥姐食飯，無偷懶㗎！我哋問佢識唔識陳振聰，發叔話，以前王德輝同龔如心嚟新界買地，好多時都係由發叔負責交吉，所以識咗佢哋兩公婆好多年，但係陳振聰佢就唔識喇，佢亦唔關心爭產案嘅審訊。