棠哥連環夾人上轎事件，發生喺星期二。當日香港各大社團公布七‧一巡遊活動，由棠哥主持記者會，透露今年巡遊嘅重頭戲，係破天荒請到禮賓府嘅人同四個局長，即係勞工及福利局局長張建宗、發展局局長林鄭月娥同政制及內地事務局局長林瑞麟及民政事務局局長曾德成，一齊同巡遊隊伍行一小段路，好似香港小姐咁，繞大球場一周，跟住仲會走出大球場行幾步，「與民同樂」咁話。

焗人無得拒絕

棠哥素有江湖地位，一言九鼎，佢講得出口嘅，無人會質疑，於是翌日消息出晒街。不過，我哋聽聞，截至棠哥公布消息嘅一刻，特首辦同幾個局長原來仍未確實回覆巡遊主辦單位，答應參加巡遊，因為政府仲要評估高調參加巡遊，會唔會刺激更多人參加下晝嘅遊行。棠哥事先張揚，講到打風都打唔甩，變相夾硬抬人上轎，焗人無得拒絕啫。

參加巡遊消息一出，據聞特首辦也為之愕然，自然要搵辦法應對，事關若公然畀棠哥食檸檬，有損和諧，睇嚟佢哋無得揀。特首辦尋日回覆我哋查詢時，話會參與巡遊起步禮，包括喺場內繞場一周，但不打算參與場外巡遊，而四個局長嘅新聞秘書就口徑一致，話會出席巡遊活動。至於係咪參與場內及場外巡遊，由於未知當日活動具體安排，無可奉告，有待磋商。四個局長嘅回覆說明乜嘢呢？棠哥先斬後奏囉。

一日兩次甩轆

世事好巧合，棠哥同日講警察上街風波，指已向政府反映工會要求第三季落實職系架構檢討，相信警察職方會收貨，取消遊行，點知兩個鐘頭之後，工會同公務員事務局局長「Ｄ姐」俞宗怡會面不歡而散，企硬發動星期日上街，棠哥變相又講大咗。一日兩次甩轆，嗰日棠哥發生乜嘢事？