香港演藝學院尋日舉行第廿三屆畢業禮，八位傑出人士獲頒博士及院士榮譽，當中最矚目係「賭王」何鴻燊獲頒榮譽博士，而前政務司廖本懷夫人毛妹及全國政協委員「阿姐」汪明荃則獲頒榮譽院士，實至名歸。卓妮尋日都有去畢業禮湊熱鬧，發現主禮人係署理政務司司長孫明揚，孫公以前係廖本懷下屬，做咗十幾年同事，今次頒院士畀廖太，認真有緣。
毛妹子女到場打氣
毛妹為本港著名芭蕾舞蹈家，今次獲頒榮譽院士，丈夫廖本懷親自捧場外，從事建築界嘅大仔廖宜康及二女廖宜菁都有到場為媽咪打氣。年屆七十九歲嘅廖本懷，在政府打滾三十年，廣結人緣，現在有好多高官都同佢共事過，其中一個舊下屬就係孫公。孫公尋日到場一見到廖本懷呢個舊上司兼好朋友，就一個箭步上前握手，寒暄一番。
廖本懷憶述，與孫公八十年代已經係同事，他在任政務司時，旗下有兩個得力左右手，一個係周德熙，另一個就係孫公。佢話：「我退咗休，周德熙又退咗休，得番孫公仍然喺政府工作。」問廖本懷點睇孫公咁襟撈？「係呀，主要有兩個原因，一係轉咗問責制，其次就梗係孫公叻啦，否則都唔會留到咁耐啦！」一頂高帽笠落嚟，唔知孫公聽到有乜反應呢？
阿姐獲頒榮譽院士
畢業禮另一個開心場景，就係汪阿姐獲頒榮譽院士，阿姐一身紫色裙及紫色皮鞋，再加件紫色院士袍，真係襯到絕，她仲特意戴住媽咪留畀佢嘅珍珠頸鏈，希望媽咪知道佢嘅成就。阿姐話，獲頒院士覺得好榮幸，而榮譽同佢職業有關，就更加特別開心。問到場為阿姐打氣嘅家英哥有乜嘢禮物送畀阿姐？家英哥不忘搞笑話：「我都親身來打氣咯，咁都仲要送禮物？」
卓妮