「頭兩個月係我意思」
華懋基金代表律師駱應淦昨質問陳振聰，有關華懋物業風水洞所用的佈局，陳聲言：「頭兩個月做嗰啲係我嘅意思，之後已經係Nina嘅意思，改良咗啲方法，其實之後掘窿已變成Nina同我兩公婆之間嘅遊戲咁」。
之後駱再追問陳振聰有關在洞中找到燒過的銀紙，陳堅決否認有教人燒銀紙，並連消帶打提及：「我有同過Nina燒銀紙……不過玩之嘛」，還否認龔到廟宇拜神是為祈求王德輝歸來，「我哋嗰日兩個去遊船河，佢話順便拜吓神……跟住佢話學吓我阿爸話嗰啲燒銀紙得唔得，睇吓運氣可唔可以好啲囉」，當日陳還替龔拍下錄影帶留念。
當駱應淦質疑陳在五份口供中，從未提過「龔如心燒銀紙係玩」之說，直指陳作古仔，陳振聰聞言即一口氣解釋：「因為我唔記得咗當時嘅心情，今日講起同Nina嘅生活，其實我哋每日生活好開心、好快樂、好多嘢玩」。
煮飯郊遊 玩遙控飛機
及後他又逕自說：「我同Nina每日好多生活，日日玩緊、日日都好多玩樂㗎，正如風水就係我哋其中一個樂趣啦，我哋又好鍾意玩遙控模型直升機啦，又一齊煮飯食啦，旅行、郊遊啦……」他又爆出其實龔如心亦有研究過他的《天圖佈局》，不過在他父親死後，她已將書燒掉：「佢話送番本書畀我阿爸喎」。
陳振聰昨日在庭上亦披露了與龔如心相識的經過，在陳九二年的工作日程簿內，在三月十二日記下了「1245時 王太 新雪園」，陳承認這就是他首次與龔如心見面。
「無答應佢搵番王生」
陳憶述當日參加梁錦濠的午餐飯局，由梁介紹他給龔如心認識。陳指當日因很多人在座，他只能與龔交談一段短時間，當時龔不是太認真地問他：「你啲風水可唔可以搵番王生呀？」，陳指自己當時心想：「失蹤咁耐真係好難搵得番，我唔想畀個希望佢，又唔想佢唔開心」，加上又想找到生意，陳便說他的《天圖佈局》有助加強運氣。在該飯局完結前，龔如心取得聯絡他的方法。
陳振聰否認曾向梁錦濠說過，「推算到王德輝尚在人間，但受了傷在東方一個島上等等」，亦沒有提過自己有辦法找到王德輝，更強調：「我無答應佢（龔）搵番王生呀，我同佢講可以增加運氣咋」。
說到當時面對刑事起訴的梁錦濠，陳振聰承認是梁的風水師，但堅稱從沒有教過梁燒銀紙，又否認要他一年來每月給他五萬元。陳強調：「佢只係響九二年頭一次過畀咗五萬蚊我啫，何況過多兩個月後，Nina都畀咗好多錢我啦」。
案件編號：HCAP 8/2007