記者 梅可茵
為期三年的醫療券計劃於今年一月一日推行，每年為七十歲或以上的長者提供五張面值五十元的醫療券，但不少長者反映在使用醫療券時經常碰壁。七十六歲的梁婆婆患有氣管炎，每年至少前往耳鼻喉科專科私人診所求診四次，每次診金二百元。梁婆婆原以醫療券繳付診金，未料求診診所卻沒有參加計劃，「諗住用醫療券睇專科，點知好多間（診所）都唔收，咁不如唔好搞！預約街症又成日冇位，真係好煩！」
患有聽障的鄧伯亦有同樣經歷，醫療券推出不久後，隨即向相熟家庭醫生要求身體檢查，但因診所未有參加計劃而未能成事，「有醫療券又有咩用？好似依家咁，有等於冇！」
「睇一次病用晒一年面額」
即使有長者成功使用醫療券，亦大呻「搵笨」。年逾八十的麥伯患有高血壓、糖尿及膽固醇過高，每月須到公立醫院門診，礙於門診名額經常「爆滿」，早前嘗試以醫療券向私營診所求診，事後發現極不划算，「我用咗兩張醫療券，但係仲要補番百幾蚊，睇門診都只係六十蚊，好似益晒啲私人醫生咁！」
衞生署資料顯示，全港七十歲以上長者約有六十六萬人，截至五月底，只有九萬六千名合資格長者曾使用醫療券，即不足一成半；而參與醫療券計劃的醫生則約有二千二百人，但至今已有一百二十三人退出計劃。
立法會福利事務委員會委員王國興指出，計劃參與醫生數目偏低，難成功推行，「長者一定有佢睇開嘅醫生，只係得二千幾個（醫生）參加，唔通要長者特登試新嘅醫生？」王亦批評醫療券面額過小，「老人家睇一次醫生可能用晒一年嘅醫療券都唔夠，政府如果想幫佢哋，就唔應該咁小恩小惠！」王建議增加醫療券面額至每年一千元，並簡化醫生登入網站程序，吸引私營醫療機構參加。
將「門診排長龍死症」外判
「醫療券根本係將公營門診排長龍嘅『死症』外判畀私營機構，一啲都幫唔到老人家！」社區組織協會主席何喜華認為，醫療券資助金額不足，長者需大幅補貼差額，「根本就係政府出豉油、長者出雞，如果係有心嘅，就應該好似以前推動學童保健，就算睇幾多次都免費，但係政府又唔敢做！」
就計劃參與率偏低問題，衞生署發言人只稱，會在有需要時調整宣傳及支援服務的安排。發言人又指，由於計劃只屬試驗性質，會先由較少金額及人數開始，會在計劃推出一年後作中期檢討，並於三年完結後進行全面檢討，包括計劃成效、資助範圍、資助金額等。
成本高須添置電腦
醫學界人士坦言醫療券使用程序繁複及需添置電腦，因而令吸引力大減。香港醫學會會董馮宜亮指出，舊式私營醫療機構大部分缺乏電腦系統，但參閱醫療券計劃使用者必須添置電腦及上網，費用比醫療券收益更為高昂。此外，醫療券網頁的登入程序繁複，部分醫護人員欠缺上網知識，亦令機構退出的意欲大增。馮宜亮建議簡化醫療券登入程序，並增加計劃的優惠，吸引醫生參加。
香港家庭醫學學院院長蔡惠宏亦承認，曾有醫生反映首次登入醫療券網站時因手續繁複而打退堂鼓。蔡建議當局檢討登入程序，擴大受惠者範圍至五十歲或以上人士，並加強計劃宣傳。