奇怪嘅係，衞生署資料顯示，截至五月底，喺大約六十六萬個合資格長者中，只有九萬六千人用過醫療券，即不足一成半！其實，早喺食物及衞生局局長周一嶽度呢條屎橋出嚟嗰時，就已經惹來劣評如潮。呢，不如聽吓啲長者依家有乜用後心得吖。

話說有個七十六歲嘅梁婆婆，患有氣管炎，經常要睇耳鼻喉專科醫生，原本以為有醫療券，雖然得雞碎咁多錢，總算慳得幾多得幾多吖，點知佢行勻好多間專科診所都唔收，搞到梁婆婆大嘆「有券等於冇券」。

鬼咩，好多私營醫療機構缺乏電腦系統，要添置電腦以及上網設施，使費隨時多過醫療券收益。最弊醫療券網頁嘅登入程序繁複，又要輸入密碼認證，又要幫病人填表格，簡直煩到嘔！

所以呢，參與醫療券計劃嘅醫生本來已經唔多，只係得嗰二千二百人左右，依家仲有一百二十幾人打退堂鼓，更加買少見少。隨着愈來愈多醫生劈炮唔玩，長者要搵地方用到醫療券，簡直要碰運氣。好嘞，就算長者咁好彩搵到接受醫療券嘅私營診所，千祈咪開心住喎，因為慳唔到診金之餘，反而可能要破財。

呢嗱，有個患有高血壓、糖尿病及膽固醇過高嘅伯伯，見公立醫院門診名額經常爆滿，諗住有醫療券，咪試吓去私營診所睇睇囉。點知最後埋單一計，使咗兩張醫療券都未夠，仲要自己補番百幾蚊至出到門口。阿伯平時睇開政府門診，都只係收六十蚊之嘛，今次信錯政府，搞到要倒貼，政府出豉油佢出雞，仲唔大叫搵笨咩！

冇計啦，政府對自己友就疏爽，之但係對老人家就好似施捨咁，既孤寒又刻薄，派得嗰二百五十蚊醫療券，打支針、剝隻牙都隨時唔止呢條數喇。

難怪立法會福利事務委員會委員王國興亦批評醫療券面額過小：「老人家睇一次醫生，可能用晒一年醫療券都唔夠，政府如果想幫佢哋，就唔應該咁小恩小惠！」

難為衞生署發言人仲喺度死撐，話有需要時會調整宣傳以及支援服務嘅安排，又話計劃只係試驗性質，會先由較少金額及人數開始，喺計劃推出一年後作中期檢討，三年後進行全面檢討，包括計劃成效、資助範圍、資助金額等。

吓，唔係啩，仲要等三年至全面檢討？人生七十古來稀，老人家仲有幾多個三年呀？其實講到尾，有邊個唔知醫療券計劃根本唔係真心真意幫老人家，當局只不過係想將政府門診排長龍嘅死症外判畀私營機構之嘛！

老吾老以及人之老，長者為香港繁榮盡過一分力，可唔可以等佢哋過得有尊嚴啲呢？對長者刻薄，即係冷血、無情！