亞視執行主席張永霖（Linus）喺電台客串做節目，吐字發音字正腔圓。咬字咁清晰有時未必係好事，「鐘錶大王」孫秉樞尋日中午巧遇Linus，孫生一嚟就畀頂高帽對方，大讚Linus主持電台節目好動聽，但話口未完就單刀直入提出批評：「不過你講得好慢，唔夠喉！」
平時客客氣氣嘅孫生突然變得辭鋒銳利，一度令Linus唔知點回應好。查實孫生已經八十幾歲，連老人家都覺得Linus講嘢慢，唔通係孫生轉數快人一倍？好在Linus見慣世面，聽完批評後不但冇面黑，仲擺出從善如流姿態話：「咁我會改善吓！」
孫生見世姪咁謙虛，笑言會繼續做對方「粉絲」收聽節目，唔係有心「柴台」喎。雖然有聽眾支持，但Linus眼見節目做咗將近五年，加上電視台工作繁重，唔排除做埋明年就暫時「封咪」。其實之前都有唔少意見，話Linus講嘢，唔叫自己做「我」，而係叫自己個名，聽落好怪，對於呢個批評，佢都話要改，估唔到佢不但唔叫自己做「張永霖」，仲要加快講嘢嘅速度添。