港區人大下月組團，考察有「血煤之鄉」嘅山西省，山西經歷多次礦難，省市領導都被撤換，當地政府提起煤礦都驚，但係港區人大之中，就有人提出不如行程加入視察煤礦洞，實地視察情況，呢個建議簡直係以身犯險，最終食檸檬收場。
全國人大辦公廳每年安排港區人大返內地考察幾次，港區人大下月中考察山西九日，早前開每月例會討論行程，聞說當場有唔止一位仁兄提出，山西礦難時有所聞，「不如今次就落煤礦洞下面睇吓啦」，即刻令沉靜嘅會議變得鬧哄哄，真係未出發，先興奮。
香港無煤洞，可能喺三十六位港區人大心目中，安排參觀煤洞就好似去桂林睇鐘乳洞咁簡單，不過，呢個建議對人大辦公廳官員嚟講，簡直嚇到魂魄唔齊。梗係啦，山西礦洞特別多意外，省市因為咁已經換過好幾次第一把手。又敏感又危險，點可以招呼港區人大去參觀？所以據聞人大辦公廳已經回覆港區人大，婉拒要求。一班人大，今次算係上咗一堂國情課喇。