「I.T.豪」譚偉豪貴為資訊科技界嘅立法會代表，平時最少兩部智能電話隨身，其中一部就係好受歡迎嘅iPhone 3G，但即將推出嘅新iPhone 3G S竟然吸引唔到佢購買。I.T.豪話，新iPhone功能與舊機相差不遠，如果開賣價貴到六千至八千元，覺得唔係好值，都係返屋企先安裝新機作業系統試吓係咪好用，然後至決定係咪買新機。
I.T.豪本身係上市公司主席，一萬幾千元對佢嚟講真係濕濕碎，但佢無盲目追求科技產品，亦都唔會唔理三七廿一捧行家場，夠晒精明。不過，新產品賣得咁貴梗有原因，事關新iPhone除咗速度快兩倍外，又新增拍攝短片、連線打機、指南針、聲控等功能，上述功能係舊機安裝新機作業系統都做唔到嘅，況且有用家話舊機裝咗新作業系統後，搜尋資料嘅速度反而比舊系統仲要慢咗，只係勉強可以接受。
根據行情，iPhone 3G S面世之後，舊iPhone 3G跌價三百蚊，現在約售四千二百蚊。