喺近日嘅一個學術界頒獎禮上，備受尊重嘅學者雲集，諾貝爾物理學獎得主楊振寧以評審會主席身份撐場，前中大校長兼中大逸夫書院校董會主席馬臨，以及中大副校長楊綱凱亦有出席。

唔認得馬臨

講起高錕近況，馬臨同楊綱凱都異口同聲話最近見過佢。個幾星期前，馬臨更喺山光道馬會會所游水時撞見高錕及其太太，高太一眼就認得馬教授，反而高錕就唔係好認得呢位舊友，查實高錕當年從馬臨手上接棒做中大校長，兩人共事多年，其實大家原本係好熟絡嘅舊拍檔。

馬臨的確好了解高錕嘅情況，佢話高錕嘅老人癡呆症係遺傳嘅，高父亦患有呢個病，所以佢有呢個病一啲都唔奇。不過睇見老友受病魔困擾，馬臨都覺得心酸。楊綱凱就話，兩個月前同高錕食過飯，感覺佢好開心，唔覺得佢有老人癡呆症。