本文重點
莎姐又再抱孫喇，個孫女仲係大眼小美人添。自由黨前副主席周梁淑怡嘅大女周智美年前誕下女兒，令莎姐榮升外婆後，上周五輪到二女周智琪做媽咪，凌晨時分剖腹誕下六磅半女嬰，ＢＢ一對大眼似足婆婆，莎姐見到孫女就嗒晒糖，索性將孫女嘅出生照擺上iPhone做手機Wallpaper，夠晒潮！
胞妹操刀接生
莎姐前日現身太古（中國）主席陳南祿嘅新書簽名會，一嚟到就主動分享抱孫消息，莎姐一邊攞出手機照片「示威」，一邊大晒幸福，話孫女趕及喺父親節前出世，認真識揀時候。今次接生醫生係由莎姐胞妹、資深婦產科名醫梁淑德操刀，上次大女智美生ＢＢ時都係搵佢幫手，話晒梁醫生係城中名媛嘅「御醫」，林青霞生女都係搵佢接生，手勢毋庸置疑，今次替自己人接生，當然加多兩錢愛心。
莎姐再度抱孫開心到笑唔停，對住孫女張相望完又望，佢話孫女遺傳咗媽咪同外婆嘅優良因子，雙眼尤其大，夠晒水汪汪。講到為孫女改乜名好，莎姐就話未諗到喎。
卓妮