香港廣東社團總會尋日喺會展大禮堂搞會董就職禮，總會首席會長之一嘅陳永棋一到場就換番條大會提供嘅會呔，幫手招呼客人。講開隻新馬「精密紡」，棋哥解釋話，「精密紡」其實係一種紗名，瑞士人發明，優點係無毛頭，十幾年前由佢家族喺內地無錫間廠率先引入內地市場，生意愈做愈好，佢希望隻新馬都好似「精密紡」咁有前途，所以就用呢個名嘞。據棋哥講，以前同經濟動力林健鋒合養過一隻馬，次次出賽必入三甲，不過係倒轉嚟數，難怪佢對「精密紡」寄予厚望。

棋哥解釋「精密紡」嘅來由。（溫國佳攝）

煲呔曾「釣魚」工多藝熟，任何場合都可瞌眼瞓。

煲呔曾搵周公勁失禮

煲呔曾尋日都有到場。早前喺一個展覽揭幕儀式上，煲呔曾趁政制及內地事務局局長林瑞麟致辭時瞌眼瞓，佢尋晚喺就職禮上又忍唔住要去搵周公，主人家王國強一開聲致辭，佢就開始眼皮下垂，而且工多藝熟，可以眼皮一邊「垂釣」，一邊嘟起個嘴扮微笑，可惜逃唔過傳媒嘅鏡頭。保安局局長李少光就低頭睇咗分幾鐘電子手帳，可能要跟貼警隊星期日遊行嘅進展啦。

卓妮