政府喺○三年七月首度委任扮嘢文出任海洋公園主席，當時香港旅遊業啱啱經歷完沙士打擊，對外更加面對即將開幕嘅香港迪士尼嘅競爭同挑戰，扮嘢文絕對稱得上係臨危受命。佢自己當年亦形容海洋公園好似一艘穿咗個窿、正在慢慢下沉嘅爛船咁，再唔大力改革就好難生存落去。

入場人次超越死對頭

扮嘢文上任後除咗經常親身粉墨登場、扮鬼扮馬硬銷海洋公園嘅活動之外，亦利用咗佢喺經營蘭桂坊生意時積累嘅創意同經驗，成功令形象同設施都呈現老化嘅海洋公園耳目一新，先後引入多項新穎嘅機動遊戲、景點同活動，又爭取到內地送多一對大熊貓同其他珍禽異獸畀佢哋，吸引大批新舊本地同海外旅客到訪，最終令海洋公園嘅入場人次，重新超越佢哋嘅死對頭香港迪士尼。

扮嘢文任內嘅另一項重大成就，就係政府撥款超過五十五億元，為海洋公園進行大規模擴建，預計大部分工程會喺二○一二年竣工。雖然佢任內亦曾發生國寶中華鱘接連死亡同熊貓咬傷人事件，但呢啲都係非戰之罪，據聞事後送咗去內地療養嗰幾條中華鱘，最近健康已經好番好多，可望喺嚟緊暑假重返香江。

政府先後喺○四同○七年同扮嘢文續約，到本月底就連續做夠六年，按規定應該冇得留低，不過佢本人就愈做愈有癮，好想親眼目睹擴建工程完工。加上除咗扮嘢文之外，佢嘅副手海洋公園副主席韋智理同另外四名董事局成員，亦會喺月底夠鐘走人，政府擔心一次過換咁多人好易會出亂子，最終都係決定破格畀佢做多三年，估計喺日內就會正式公布。唔怪得知扮嘢文尋日出席海洋公園嘅「史前夏水禮」開幕派對時，繼續扮嘢扮到上晒身，仲識得借啲意暗寸對手迪士尼，完全唔似即將告別離任！