立法會前日開財委會審批撥款申請，當中包括近十億元購買及注射豬流感、肺炎球菌及季節性流感疫苗所用，呢筆錢都唔少嘢，點知我哋發現公民黨梁家傑開會時開小差，公然瀏覽Facebook，對住一個着住低胸小背心嘅妙齡少女照，盡情欣賞咗接近十分鐘，睇到喜形於色，期間仲笑笑口望住隔籬位同僚。事件在政圈內議論紛紛，記得以前教統局局長李國章開會打機，泛民主派議員窮追猛打，但今次泛民卻嚴人寬己，簡直係雙重標準。
袋巾梁嘅大狀黨友余若薇（Audrey）尋日話，其實好多時議員都會帶電腦入會議廳同外界聯繫，而Facebook亦係同選民溝通嘅方式。至於畀我哋影到，以後係咪應該檢點啲呢？Audrey竟然話：「個位畀人影到又唔係咁方便嘅！」莫非佢暗示如果無記者影到，就可以慢慢同位低胸妙齡少女選民一邊開會、一邊溝通？
白鴿黨主席何俊仁亦輕描淡寫話，開會咁長時間，議員行出行入或上網都無可厚非。對於袋巾梁笑笑口同隔籬位同僚分享低胸妙齡少女網頁，何俊仁就反問：「你又點知佢哋講緊呢樣嘢呢？未必係講緊個女仔低胸呢！」如果係咁嘅話，大家當年就鬧錯李國章，更加唔應該批評議員開會捉象棋、睇漫畫同埋玩遊戲，係咪咁呢？
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |