立法會議員平日義正詞嚴，狠批高官表現縮骨、脫離民眾，但輪到佢哋回應減薪問題，就人人放軟手腳，推莊卸力。專業會議何鍾泰、民建聯陳鑑林、經濟動力林健鋒、職工盟李卓人同勞聯李鳳英，全部都話跟機制行事，白鴿黨主席何俊仁尋日仲叫大家，做嘢唔好為一時即興贏掌聲。金融海嘯之下，普羅打工仔凍薪、減薪，社會要求高官、議員減薪，與民共度時艱，醞釀已久，點會係一時即興？如果等到今年十月先至跟機制檢討議員薪酬，港府預測會通脹百分之一，議員咪變相逆市加人工？

余若薇搞唔清薪酬機制

最離譜係Audrey。佢話議員嘅人工唔高，未到高級公務員嘅水平，相比之下，議員只係等於凍薪嘅中、低級公務員。我哋問佢會唔會帶頭建議減薪？Audrey話，都係跟機制好啲。Audrey平日批評高官脫離民眾，其實，佢尋日呢番話，簡直連最基本嘅ＡＢＣ都搞唔清。低級公務員嘅定義，係月薪一萬五千七百幾元，中級公務員每月亦搵唔多過四萬八千元。相比之下，議員月入六萬五千二百六十元，兼有每月工作實報實銷津貼十二萬八千元，仲有每年兩萬五千元醫療津貼、交通津貼及任期四年後攞到嘅四十七萬元任滿酬金，點會等如中低級公務員呀？可能Audrey唔將錢銀放在眼裏啩。

自由黨唔敢再次提減薪

本身係上市公司主席嘅「ＩＴ豪」譚偉豪，就心水清得多，尋日話同意議員跟高級公務員睇齊減薪百分之五點三八，仲好快噏得出議員都係減人工三千幾蚊啫。

自由黨主席劉健儀就最直，自爆自由黨喺○三年沙士時主動提出減薪一成，與民共度時艱，但當時同僚有微言，依家佢哋都唔敢再提主動減薪，都係跟大圍走。人同此心，心同此理，○三年有立法會議員唔妥自由黨主動減薪，六年後嘅今日，議會內呢類人大有人在；咁縮骨嘅表現，同平日被佢哋口誅筆伐嘅特區高官有咩分別？