之不過咁，香港有一隻實力更加強橫嘅烏蠅，奧巴馬就算想拍，睇怕都未必可以輕易拍得死。乜嘢烏蠅咁勁揪？咪就係醜聞多多嘅平機會主席鄧爾邦囉，呢隻烏蠅生命力不知幾堅，審計署拍佢唔死，傳媒拍佢唔死，立法會加多幾錢肉緊拍多幾拍，一樣暫時未拍得佢死。即使有奧巴馬幫拖，功夫茶相信以鄧爾邦嗰種狡猾身手，仍然可以有本事飛得出如來神掌手指罅。

有消息透露，立法會政府帳目委員會經過多番公開聆訊以及閉門討論之後，一致同意「落重藥」，對鄧爾邦表示「極度遺憾」。之不過咁，帳委會唔似得上次對付旅發局咁，係唔會要求鄧爾邦退還人壽保險保費，或者轉交執法機關跟進嘅。

話就話「落重藥」啫，「極度遺憾」咁又點呢？計功夫茶話齋，鄧爾邦一日唔引咎落台，一日都未算彰顯公義。喂，審計報告講得清清楚楚㗎啦，呢條友仔管理唔止混亂，而且不斷損公自肥，未經政府批准就自把自為購買人壽保險，去北京出差住嘅係每晚租金二千八百八十元嘅「大使套房」，其他大花筒行為多不勝數，總之就係一個購物狂。如果咁都唔使執包袱，點樣體現問責精神呀？

一方面係損公自肥，另一方面又係大話連篇，平機會委員踢爆，鄧爾邦對於審計報告左瞞右瞞，以保密為藉口，唔肯向委員透露報告內容。你話吖，帳委會只係「極度遺憾」咁大把，足以彰顯公義咩？

功夫茶主張狠狠拍死呢隻烏蠅，一來固然係為咗彰顯公義啦，二來，其實仲有另一個原因。你知啦，理論上平機會係要為弱勢社群服務嘅，如果你係正生書院浪子回頭改過自新嘅勇敢學生，畀街坊左一句「吸毒仔」、右一句「吸毒妹」係咁鬧，理論上係可以向平機會投訴嘅，理論上又可以嘗試討回公道嘅。問題係，平機會都畀鄧爾邦佗衰家咯，一早自廢武功，弱勢社群靠佢哋幫拖？咪玩啦！

所以話啫，帳委會就算真係表示「極度遺憾」，咁樣仍然係未夠㗎，所謂「落重藥」，臉皮厚過電話簿嘅鄧爾邦直情當你請佢「飲涼茶」。

諗諗下，不如搵曾蔭權出手喇，睇下煲呔曾拍烏蠅有冇奧巴馬咁好身手。如果拍得死鄧爾邦咯喎，咁咪大快人心囉，如果拍唔死，起碼知道曾蔭權嘅身手遲鈍到邊個程度吖嘛！