立法會改善空氣質素小組委員會尋日開會，點知環境局副局長潘潔因一個日期成為箭靶。話說班委員好關心當局幾時就檢討空氣質素指標報告做公眾諮詢，不斷問會唔會喺七月開始，但潘潔一律採取軟皮蛇態度，講極都只係話「我哋嘅目標係盡快」，激到有泛民議員發火，左一句「咁大個政策局，點會今日唔知聽日事」，右一句「如果連目標完成日期都無，換個政治問責官員算啦」！連主席余若薇（Audrey）都幫拖話：「潘博士連個日期都唔肯講，唔係好公道！」仲同意今日喺內會向主席投訴潘潔態度不佳。
副局長上場後，負面消息不絕。早前亦是非纏身嘅商務及經濟發展局副局長蘇錦樑，尋日喺個宣傳粵港合作活動時，問佢點睇教育局副局長陳維安太太喺停課期間，要求學校為小學畢業嘅大仔及同學開畢業聚餐，佢一於封口不談，以免講多錯多。
講開又講，同好多今年小學畢業嘅學生哥一樣，六年前嘅今日，陳維安個大仔都因為沙士搞到無得行畢業禮，點知今年又遇上豬流感，所以佢太太要求學校幫合共五十多名小六同學仔搞畢業聚餐，等小朋友們有個美好回憶，點知就搞出個大頭佛，要怪就只能怪佢太太不懂避忌，無端端為老公添煩惱。