立法會新丁李慧琼（Starry）首個議員辦事處尋日開張，而且好快會喺大角咀開第二間議員辦事處添。由上星期五開始，全港嘅幼稚園、小學同特殊學校停課十四日，Starry讀緊小一嘅囡囡都受到影響，佢笑言，囡囡知道唔使返學就好開心，不過作為家長嘅就認真頭痕。
議員辦事處嘅數目同工作量可謂成正比，Starry話，好彩前日收到學校老師電話，通知佢囡囡仲有一科數學未考，佢一聽到就即刻買咗本數學練習畀個女做，一嚟唔會因停課而荒廢學業，二嚟唔使諗爆頭為女兒安排節目。講開讀書，Starry因為覺得自己已經冇乜時間陪屋企人，所以兩母女一有時間相處，佢就寧願帶個女去玩，將溫習嘅重任「外判」畀補習老師。
Starry原本準備立法會休會後就帶個女去旅行作補償，可惜呢個親子活動卻因豬流感而受阻，佢話：「好似去完（外地旅行）都實中招，我都係要睇定啲！」囡囡聽到呢個壞消息可能會冇晒心機溫書都唔定，Starry真係要諗定好橋氹番個女先得喇。