食肆魚缸水唔衞生，香港近年時有所聞，政府把心一橫，建議一網打盡，將維港、避風塘、港島同新界西呢四個大腸桿菌高企沿岸列為禁區，唔准抽海水養海鮮。好可惜，維港嘅範圍正正係東起海鮮檔林立嘅鯉魚門，檔主群起反對新例。張宇人、黃容根，加埋地區議員李華明、陳鑑林、梁家傑、黃國健當堂義不容辭，爭相為「米飯班主」解決問題。唔同政黨，竟迅速企埋同一陣線。

逼政府讓步劃歪啲條界

維港海水唔衞生唔多適合養魚，相信冇人反對，平時聲大大講原則嘅議員，今次真係要睇吓佢哋點樣轉身。張宇人話，佢嘗試從中斡旋，睇吓各黨可唔可以達成共識，迫使政府讓步，將維港條界劃歪少少，禁區不入鯉魚門沿岸，又或者容許業界將抽水條喉離沿岸遠啲。張宇人話，鯉魚門食肆幾十年嚟都係咁樣攞水養魚，要佢哋改變，營運成本大增，希望港府「畀條生路業界行吓」咁話。

選票大過天冇咁易收貨

民記、工聯同自由黨話晒都係親建制派，只要政府唔過分，民意反彈唔大，平時政府提交附屬法案，佢哋一般都順攤收貨，而民主黨李華明亦一向同食衞局官員有偈傾，不過，選票大過天，呢次港府面對呢班「抽水議員」都相當頭痕。

香港政爭激烈，估唔到一條附屬法例可以令各左、右政黨走埋一齊，聽日仲一齊柴娃娃入鯉魚門睇食肆嘅抽水操作，其實呢次考察真係有啲多餘，講到深明「抽水」之道，政黨認第一，無人敢認第二，按一貫做法，喺立法會足不出戶，指點江山，只要數夠票，一樣可以要政府跪低啦！附屬法例嘅決議案最遲喺七月八日，即係今年度立法會最後一次大會上表決，政黨係咪咁惡，到時自有分曉。