政府部門執法不力，不但縱容「路霸」佔用政府土地，用以防止阻塞走火通道的消防欄更被「拆完再拆」，將官地闢作私人上落貨區。早已知悉霸地情況的地政總署只不斷知會路政署復修被拆消防欄，但對長期佔用官地的問題束手無策，而食物環境衞生署、消防處及警方亦各自為政。立法會議員批評政府部門面對大部分事件均缺乏統一協調處理機制，終令簡單問題複雜化，甚至解決無期。
記者 徐少琴
葵涌區內工廠林立，無時無刻均有貨物上落。在葵芳區上班的李先生指出，受工廠上落貨物影響，葵順街與葵康街之間的一段官地長期有貨車違例停泊，不但製造行人危機，衍生問題更加不容忽視，「貨車、私家車乜都有，啲木板、發泡膠、紙皮箱堆晒喺度，仲成日有人用鏟車搬貨添！」李擔心一旦發生火警，堆積如山的貨物勢必阻礙消防車駛入，後果堪虞。
堆滿卡板舉步維艱
李更發現，有人為了方便上落貨，竟將通道兩端的消防欄拆去，「啲消防欄拆咗出嚟就咁放埋一邊，如果跌落嚟整親人，又或者啲鏟車撞倒人，係咪由政府負責？」李曾透過1823政府熱線投訴事件，卻一直未有部門處理，「好似無王管咁！」
就記者現場所見，上址兩個消防欄相信已被拆去多時，並倒轉擱在一旁，通道內則泊滿車輛，不少工人正忙於搬運貨物，儼如小型卸貨區。大批紙箱及用作搬運的卡板堆滿通道，令行人舉步維艱。
本報分別向四個政府部門查詢上址情況，消防處及食環署以上述地點不屬管轄範圍而拒絕處理、警方則重申只會負責檢控違泊車輛。不過，負責管理政府土地的地政總署卻將違泊及修復消防欄責任推卸予警方及路政署，但對官地長期被霸佔卻未能交代解決方法。
身兼葵青區區議員的立法會議員梁耀忠直指部門執法不力，形同縱容，「霸晒成條通道、又破壞公物，啲部門冇理由咁都仲唔做嘢！」梁估計出現上述問題，緣於區內泊位不足，部門要根治問題，必須從源頭做起。
議員炮轟欠缺協調
至於維修消防欄與檢控違泊一事，梁耀忠認為單純維修與檢控未能杜絕霸佔官地情況，加上事件涉及不同部門，問題將更形複雜，「啲部門最鍾意就係各自為政，裝番個消防欄又畀人拆過，抄完牌又繼續違泊，一日唔制訂一個跨部門協調機制，呢類問題始終都解決唔到！」梁促政府部門正視情況，盡早商議協調及採取聯合行動。
人人做記者ireport_00019467