基督教臻美黃乾亨小學暨初中學校鬧出連串行政混亂醜聞，校監梁淑貞被視為罪魁禍首，外間一度盛傳，梁淑貞係前廉政專員羅范椒芬介紹畀黃乾亨小學前校監黃英琦（Ada）認識嘅，就連當年有份畀錢嘅Ada細佬黃英豪都證實呢個傳聞，難怪令羅太成為傳媒追訪目標。
前晚我哋喺友好協進會晚宴撞到黃英豪（Kennedy），黃英豪初時唔願意再提舊事，強調當年佢哋五姐弟夾咗五百五十萬元辦學，除咗紀念父親黃乾亨七十歲大壽外，亦係一心行善，興學育才，未諗到搞出風波。點知我哋追問佢係咪羅太介紹梁淑貞畀佢哋認識，Kennedy坦言話：「聽阿姐（Ada）講，係羅太介紹梁淑貞畀佢識嘅。」咦，羅太早前話唔認識梁淑貞，佢同Kennedy邊個啱呢？
於是我哋打電話畀羅太，羅太大為緊張，堅稱無做過梁淑貞同Ada嘅雞仔媒人，同記者講咗半粒鐘，收線之後再打電話畀記者，話即刻搵過Ada，Ada都親口證實，梁淑貞嘅介紹人，其實係教育署高級助理署長湯啟康，叫記者搵Ada求證。羅太咁緊張，記者不敢怠慢，搵到Ada，Ada好均真，還羅太一個清白，指係Kennedy知啲唔知啲，聽到教署高官就誤以為係羅太啫。單嘢傳咗咁耐，依家終於有個了斷！