我哋早前講過，立法會議會聯絡小組準備畀八個議員、每人三四萬蚊去東歐外訪十至十二日，同當地立法會機關交流，為免議員爭崩頭，佢哋仲整咗套外遊比例代表制；點知外訪團都未出發，另一個外訪團已經密鑼緊鼓，原來立法會滅貧事宜小組委員會，準備七月下旬外訪，去南韓同台灣睇吓當地社會企業嘅發展情況。
其實上屆立法會研究有關滅貧事宜小組委員會，○七年九月已去過西班牙同英國，睇吓當地社會企業嘅發展。今次立法會繼續去睇社會企業，地點本來選擇咗去日本、新加坡、南韓同埋台灣，不過唔知係咪因為金融海嘯，加埋日本大爆豬流感，最後決定只係去台灣同南韓就算數。
立法會文件話，呢個立會外訪團準備喺下個月嘅十九日，立法會抖暑無幾耐就出發，去台北同首爾七日。
立法會秘書處計過條數，如果坐經濟客位的話，每名議員大概使二萬零四百蚊，坐商務客位就要兩萬九千七，現正接受報名。唔知今次又會唔會爭崩頭呢？