膠袋稅未推出前，有機構於本月初進行調查，發現已有六十多件貨品，如飲品、洗潔用品改用「大手抽」厚膠袋包裝，估計是生產商因應下月實施膠袋稅，因此以這類包裝吸引消費者，顯示實施膠袋稅可能「好心做壞事」，增加膠袋用量。

看官，呢啲就叫做「道高一尺，魔高一丈」喇！坦白講，啲人去超市買餸，好似蔬菜海產家禽之類，濕濕漉漉，即使自備環保購物袋，都要多包幾層白色透明膠袋，試問又點會環保呢？邱騰華最叻瞎折騰，一招「停車熄匙」未見其利先見其害，搞到個的士司機雞毛鴨血，因「停車熄匙」致車廂燠熱與客爭執而惹官非。如今再來一個徵膠袋稅，令到商家顧客都麻煩。老朽每次去超市或便利店，啲收銀阿嬸必定問：「有冇帶袋啊？」答之：「冇！」「咁下次記得帶袋咯噃！」

起初，老朽都陰聲細氣解釋：食完飯，順便買啲飲品生果，哪會成日帶住個袋周街逛！「咁下月七號要畀五毫膠袋稅噃！」「我願意！」

唔好話老朽心邪，有時遇到後生啲嘅女收銀員追住問：有冇帶袋啊？老朽以為宣傳防止愛滋病，走出安全正確第一步！奉勸所有女收銀員，此時此刻，用詞不宜精簡，講多兩個字：有冇自備購物袋啊？要是個個女收銀員都問：有冇帶袋啊？認真刺耳也！此外，如有懶音或非廣府新移民的女士，更要避免個「膠」字，一於講「購物袋」啦！

其實，好似「停車熄匙」、「自備購物袋」，政府多些宣傳，學校加強教育，環保署及環境局啲高官多啲身教，最好示範吓自己如何喜歡過環保生活，日子有功，全城冇人用袋矣！