立法會廠商會代表林大輝上任後輪住搵唔同界別人士開餐，尋日輪到宴請資訊科技及物流界食飯，創新科技署署長陳育德都係座上客之一。大輝大嘆做議員後應酬多，肚腩肥咗、近視都加深埋，付出嘅代價，唔係錢可以衡量。
提起隻愛駒「更奇妙」周日出戰馬場時喺賽事途中斷腳，被迫人道毀滅，大輝話事件仲有下文，原來佢本來為馬匹買重保險，每年至少保費十萬八萬銀，萬一愛駒唔好彩戰死沙場就有得賠，點知佢因為太忙，「更奇妙」嘅保險喺六月二號到期後竟然冇去續保，咁啱得咁蹺，「更奇妙」就喺五日之後「陣亡」，因為過咗保障期，所以一個仙都冇得賠，變相唔見至少幾十萬，真係唔怕一萬，最怕萬一。
講番時下青少年吸毒風氣氾濫，身為中學校監嘅大輝都感同身受，佢話暫時未發現自己間學校有學生吸毒，但希望學生潔身自愛，同毒品Say No，佢又批評政府打擊毒品不力，話有必要加強機場及口岸檢查，徹底堵截毒品源頭至得喎。