行政會議召集人梁振英（CY）被視為疑似特首候選人，一舉一動都惹人遐想，好似早前自爆○三年代表港府上京商談落實個人遊咁，就好易令人聯想起特首選戰。回應傳言，CY尋日剖白心迹，佢引用大和尚覺光法師嘅說話，指「做大眾嘅事，總會有人說你，不用害怕，只要行的是正道便好」，換句話講，即係呢場特首前哨戰，CY無打算退縮囉。
CY喜議論時事，例不虛發，上個月港府亂「派糖」博掌聲，CY就喺報章撰文，批評「政治唔係請客食飯」，被指暗踩另一位有意競逐特首嘅高官。CY尋晚喺一個酒會上辯解，「政治唔係請客食飯」，同「革命唔係請客食飯」一樣，已經成為一句政治諺語，佢無意攻擊任何人。
CY尋日亦喺個人網誌上剖白對種種傳言嘅心迹，話上星期日參加咗覺光法師嘅九十壽誕素宴，覺得覺光法師嗰句：「不用害怕，只要行的是正道便好。」對所有公職人員嚟講真係好有啟示同鼓舞作用咁話。
咁又係嘅，特首之戰，路途險阻，如果唔時刻提醒自己揀嘅路無錯，唔使驚咁多，點樣捱落去呀？