田少尋日同傳媒飯敍，講起個超豪駕駛課程就眉飛色舞，田少話，查實佢揸咗法拉利已經好多年，但係法拉利車廠認為一般人擁有佢哋出產嘅車，通常只識用部車一半嘅功能，另一半就嘥咗，今次上堂，可以學用埋另外嗰一半，抵晒！係咪抵晒？今次兩日一夜嘅課程，盛惠三萬大元，抵唔抵，佢心裏有數嘞。抵得諗陪佢去上堂嘅，有佢嘅乖乖女婿。

我哋早前講過，田少計劃九月去法國南部參加保時捷自駕遊旅行團，佢最近成功搵埋前自由黨副主席周梁淑怡及其老公周明權做伴。

至於旅發局嘅新搞作，係出咗一本書：《『叮叮』香港電車地圖》，介紹電車沿線嘅美食及玩樂景點，教你使幾蚊雞由西環玩到去筲箕灣。田北俊話佢都係電車迷，最愛由中環搭「叮叮」去金鐘，貪佢夠順路，唔似坐其他車咁左兜右兜。下次喺電車上見到田少，咪笑佢係「電車男」喎。