香港友好協進會尋晚喺灣仔會展大禮堂舉辦成立廿周年聯歡晚宴，筵開一百六十席，場面成個政商界武林大會一樣，唔少大孖沙親身到賀，或者由子姪做代表，不知幾墟冚。
聯歡晚宴七點開席，六點迎賓，卓妮早到咗，撞見一幕「奇景」：可能係時間尚早，幾位全國政協常委無拘無束咁坐喺場邊嘅矮壆上休息、吹水，一班老友記包括主人家陳永棋、福建幫嘅洪祖杭同楊孫西，仲有全國政協黃楚標，期間楊孫西仲翹起二郎腿，簡直係大場面裏面嘅後台風光。
唔再做行政會議成員嘅政協常委肥龍許仕仁一現身，就老友鬼鬼咁捏住棋哥兩邊膊頭，棋哥嫌佢手多多，腦筋一轉，以近期熱爆嘅華懋集團同陳振聰嘅龔如心千億遺產爭奪案開玩笑，寸肥龍話：「我唔係姓龔，你又唔係姓陳，有乜好捏啫。」肥龍笑到見牙唔見眼。肥龍尋日好明顯清減咗一圈，不過點都唔肯講有乜秘訣。
筵開160圍 揼純官心口
尋日嘅賓客絡繹不絕，有「賭王」何鴻燊、新世界集團董事總經理「純官」鄭家純、恒地副主席李家傑、全國人大常委范徐麗泰，同最近家族捲入基督教臻美黃乾亨小學暨初中學校風波嘅全國政協委員黃英豪，司局長亦唔少。
友協會揀喺會展筵開一百六十圍，財力雄厚，棋哥透露，係向純官同洪祖杭揼心口嘅，不過，佢搵純官時，開價只係一百二十圍，點知到頭嚟賓客太多，開多咗四十張枱。棋哥講笑話，如果純官唔認數，都唔知點算，好彩會展係新世界集團旗下，相信唔會絕情到即刻落閘拉人嘅。卓妮幫棋哥試探純官，純官有啲無奈咁話：「依家都無得減㗎啦，惟有畀錢囉。」
卓妮