回歸前科技大學建築費超支約三十億元，當年嘅立法局已經嘈到拆天，今次西港線超支再多一個開，班立法會議員自然唔肯放過Eva，喺早前嘅立法會鐵路事宜小組委員會，用「天價」嚟形容今次造價，炮轟政府畀港鐵「搵笨」同「㩒住搶」，Eva嘅民望又點可以唔應聲下跌呢？

胸有成竹 循例游說

立法會議員其實處境兩難，佢哋要為居民爭取盡快興建西港島線，同時佢哋又係由市民選出嚟，要幫手睇住政府盤數等政府唔可以亂嚟，不過睇嚟今次啲議員都係要「硬食」嗰筆撥款。

Eva好似對立法會通過西港島線工程撥款胸有成竹咁，堅持如期將撥款提交今日嘅工務小組委員會進行初步表決，期間港鐵同政府都有循例做吓游說工夫，不過就冇提出任何具體讓步建議或者交換條件。歸根究柢係政府睇準有大批港島區選民好希望西港島線盡快上馬同通車，解決中西區嘅交通擠塞問題，甚至可以間接刺激當區樓價，加上有關工程可以創造唔少就業機會，就算造價再超支多幾倍，班議員都唔敢公然得罪選民否決撥款。

過半票數 表態支持

我哋尋日逐一問過工務小組委員會二十八名委員對撥款嘅最新立場，其中民建聯、自由黨、專業會議同多名建制派獨立議員，都清楚表明會投贊成票；平日對政府諸多批評嘅兩名港島區單打女將，亦屈服於選票壓力表態支持，火速湊夠過半數嘅十五票；即使係對造價超支及工程細節有好多不滿嘅民主黨、公民黨同工聯會，亦最多只會投棄權；唯一有可能投反對票嘅，就係喺港島區連一席都冇嘅社民連。

其實今次工務小組委員會投票並冇法律效力，真正嘅戰場係下月初召開嘅財委會。不過只要港鐵同政府肯再做多些少嘢，估計連嗰三個黨派都要被迫「硬食」，舉腳支持撥款。