話說有「東方威尼斯」之稱嘅大澳水鄉，保留咗傳統漁村風土人情，嗰度仲有片好有生態價值嘅私人蘆葦林。呢片僅次於米埔嘅全港第二大蘆葦林，唔止可以畀各種生物喺度棲身，仲可以發揮天然過濾機作用，濾走化學以及有機污染物質，改善水質。都算規劃署識貨，○二年已將呢片蘆葦林推薦為「自然保育區」，話要好好保護喎。

可惜成班高官向來都係大隻廣，口號大過天，識貨又點吖，咪又係講一套做一套，自然保育區至今原地踏步，連規劃都欠奉，最弊係業主年前仲喺蘆葦林大興土木，有工人唔理三七二十一，將碎石以及沙泥之類嘅建築物料，順手堆晒喺蘆葦林上面，搞到啲蘆葦枯黃有之，監生被泥頭壓死又有之。

有大澳居民睇唔過眼，兩年前已不斷向多個政府部門求助。但係你知啦，做官嘅冇嘢叻，最叻係耍太極，佢哋以土地屬於私人擁有為理由，一於闊佬懶理。規劃署人員仲要喺度死撐，話當局喺○四年底提出嘅「大嶼山發展概念計劃」中，原本諗住為大嶼山嘅未來作全面規劃，而大澳嘅改善工程，就係屬於主要建議之一。該署仲話喎，經考慮公眾以及立法會嘅建議後，已經喺○七年中委託顧問公司為大澳改善工程作可行性研究，而制訂法定圖則工作，要等研究完至可以進行。

唔該擘大雙眼睇清楚啦，咁具生態價值嘅地方都搞到咁，仲要拖得就拖，拖到蘆葦林變垃圾崗，可想而知，政府對環保嘅誠意到底有幾多吖。

政府環保得把口，好多風景秀麗嘅自然環境，任得人哋非法堆積垃圾又得、填平水塘又得，難怪環保團體咁谷氣。呢嗱，船灣濕地就試過畀人非法建路；大嶼山貝澳濕地仲大劑，堆滿石屎泥頭以及殘破油桶，係人都把幾火啦。

環保署年初公布過，處理中嘅非法傾倒廢物以及堆填地點差唔多有一百處，當中包括綠化地帶、自然保護區及海岸保護區，可見非法傾倒廢物以及堆填問題係幾咁嚴重吖。講到尾，成個政府根本就冇長遠嘅保育政策，香港遲早冇晒自然生態！

話時話，發展局局長林鄭月娥曾經好豪爽咁承諾，準備擲六億元出嚟活化大澳，保存棚屋、製造蝦膏以及神功戲表演呢啲傳統文化，可惜講嚟講去又係十畫未有一撇。

其實，唔好話保存傳統文化，政府連大澳嘅渠務設施都未搞得掂啦，落親大雨，大澳都變成澤國，仲話搞乜嘢東方威尼斯喎，再係咁搞落去，成個大澳遲早被水浸晒，變成阿特蘭提斯添呀！