呢個由阿Paul做主席、資深會計師林智遠做副主席嘅基金尋日正式成立，主要係幫會計同行提供支援服務，譬如搞吓職業諮詢、考察同埋交流活動等。阿Paul自己就先掟十萬蚊出嚟啟動個基金，將來由佢同副主席聯手撲水，期望個基金可以持續發展。不過今次要阿Paul自己科住水先，佢都略帶肉赤咁話，都係金融海嘯作怪，搞到佢四圍揼人心口都無用囉！

基金成立之後嘅頭炮活動，就係同香港華人會計師公會合作，搵咗廿六間會計師樓提供五十個暑期實習職位，由大一至大三嘅同學都歡迎應徵。阿Paul話，呢五十個實習職位主要來自中小型會計師樓，應該畀到學生唔少實戰機會；至於實習人工就由各會計師樓自己定，總之係良心僱主價，好似阿Paul就出月薪五千蚊，對實習生嚟講，都算相當唔錯㗎喇！