本文重點
喺立法會選舉期間衝紅燈而被罰停牌半年嘅立法會議員馮檢基，近排經常要乘搭港鐵往返立法會，有時見佢攞住一袋二袋，又背囊又環保袋，都唔知搞乜，卓妮尋日喺中環撞到阿基，見佢又係一袋二袋，問佢趕住去邊？點知佢好大方打開個袋，內裏裝有波鞋和運動衫，仲有陣汗味傳出，原來啱啱去完做GYM Keep Fit。佢話每星期會去兩至三次，在教練指導下，樣樣健身器材都有玩吓。
少食多餐瘦廿磅
阿基玩GYM源於○四年中大一項健康實驗，佢甘願做白老鼠，按照醫生指示做運動同節制飲食，結果三個月內由一百七十磅減到一百五十磅，足足減咗廿幾磅，仲戒埋每日一罐汽水嘅壞習慣。究竟有乜減肥秘笈咁有效呢？就係少食多餐，連阿基都驚訝原來呢個方法真係減到肥嘅。阿基做完白老鼠之後，一直保持做運動，至今五年都只不過係重番九磅啫！
近日有中學生吸食軟性毒品搞到入醫院，又有十幾歲少女持刀打劫的士司機，實在令人憂慮。阿基話，以前成績差啲都畀人踢出校，相反依家人人都有書讀，學生自然無咁珍惜，加上學生多咗，教師自然面對很大壓力，所以政府應加快推行小班教學，請多啲助教睇實啲學生喎，唔知今時今日嘅教育局受唔受呢？
卓妮