係咁嘅，○五年三月十五日，當日有一單譚姓一家四口食咗毒帶子不適送院嘅新聞，其中一張翌日刊登於《東方日報》頭版嘅獨家照片，竟然被《蘋果日報》、《成報》、《星島日報》、《東周刊》等多間傳媒機構盜用喎。盜用照片，即係侵犯版權啦，即係偷竊行為啦，東方認為事態嚴重，即刻向涉案嘅傳媒機構以及相關記者採取法律行動，同時又向警方、海關同埋廉署舉報。為乜要搵埋廉署？喂，除咗侵權之外，點知有冇人收受利益(o架)！

好嘞，報咗警嘞，事隔四年嘞，咁又點呢？警方冇行動，海關冇行動，廉署冇行動，所有執法者完全冇行動。

期間，東方為咗討回公道，保護知識產權，於是自費超過百萬元律師費，向涉案嘅傳媒機構以及擅自外洩照片嘅記者，提出民事索償。由於鐵證如山，根本冇得拗，包括《蘋果日報》在內嘅有關傳媒一早向東方賠償求和，至於涉案記者高潤添，日前亦被法庭判處敗訴。事件纏擾四年幾，東方先至靠自己討回「最終的公道」咋，只不過，所得嘅賠償少得唔成比例囉。

東方就話有本錢、有魄力擇善固執啫，問題係，係咪人人畀得起百萬元律師費呀？小市民假如受到侵權，點算好呀？如果冇錢請律師打官司，係咪任由賊佬魚肉呀？時事評論員宋小莊就講得啱嘞，呢件事反映政府保護知識產權係講一套做一套，對受害人毫無保障。

計功夫茶話齋，啱啱咪成立咗一個「創意香港辦公室」嘅，又話要推動創意產業，又話要打造創意之都，嘥氣啦，簡直呃鬼食豆腐。政府維護知識產權軟弱無力，任由賊佬侵犯版權，邊個創意澎湃，邊個就係苦主，你估仲有冇傻瓜肯同你捱義氣搞創作吖嗱？

其實唔止東方係受害者，有一位從事廚具設計嘅工業家汪恩光，過去十年耗費近千萬元向十二間侵權嘅公司提出民事訴訟，幾經辛苦先至攞番二百萬賠償咋。汪先生好憤慨咁話：「政府唔會幫你，只係得個講字！」

唉，講到尾，又係選擇性執法囉，又係壹淫媒永遠受到優惠囉。壹淫媒利用種種卑劣手法盜竊東方報業集團嘅新聞成果，已經Ｎ咁多次嘞，冇一次會重罰嘅。最離譜嗰單係盜用王菲懷孕搭飛機獨家照，東方明明係勝訴，點知法官居然判東方要同敗訴嘅壹淫媒埋單畀堂費，東方要上訴至終審法院先至取回公道。

冇(o架)喇，創乜鬼意之都吖，侵權之都就有。最好就係成立一個「侵權香港辦公室」，委派淫賤黎做總監，等佢開班授徒教賊佬，呢嗱，咁樣抄襲咪得囉，咁樣剽竊又得咗，咁樣盜用亦得米。

冇(o架)喇，政府袖手旁觀，公義蕩然無存，邊個搞創作，邊個就乞米。一句到尾，縱容賊佬侵權，官僚謀殺創意！