話音未落，社民連嘅長毛梁國雄即刻幫拖反問金勞詹：乜嘢叫後果自負？金勞詹聽到火都嚟埋：「議會要互相尊重，否則後果自負！」長毛反唇相譏：「主席，佢恐嚇我，我唔驚你㗎！」兩人愈鬧愈激，結果會議被迫中止。

劉慧卿撥火

休會期間，白鴿黨副主席劉慧卿竟然仲火上加油，叫金勞詹同長毛兩個各自攞把槍去決鬥，唔好阻住會議進行。金勞詹即時拍晒枱指住佢大罵：「你哋講就得，人哋講就唔得？」主席惟有叫金勞詹同長毛入房傾，擾攘約五分鐘先繼續投票。

今次金勞詹咁㷫，唔知係咪因為上次談及六四議題時，畀泛民議員話「鄙視」佢，谷住道氣咁耐，尋日終於爆發出嚟。講番個動議，成班問責官員被議員批評到體無完膚，惟獨食衞局副局長梁卓偉得到議員稱讚。自由黨主席劉健儀話副局長同政治助理個個面目模糊，但梁卓偉近排就頻頻開記者會交代豬流感最新進展而人氣急增。