陳振聰一面就已故華懋集團主席龔如心嘅千億元遺產打官司，一面又出售私人飛機及物業套現。由去年至今，陳振聰已經成功售出多個豪宅單位，其中一個位於麥當勞道百年順大廈一個連車位單位，上月以二千二百八十萬元成交，買家叫星鴻集團有限公司，公司董事原來係久未露面嘅前旅發局總幹事臧明華。
臧明華嘅生活品味向來高檔脫俗，唔係豪宅都唔吼，當年任職旅發局總幹事時，已居於格調高雅、遠離人煙嘅港島陽明山莊，附近黃泥涌水塘仲有得撐艇仔。○七年審計署報告炮轟旅發局大花筒購買超豪全家保，立法會就報告展開聆訊期間，臧明華就利用星鴻公司名義購入半山嘉雲臺一個單位連車位，成交價近三千萬元。
事隔唔夠兩年，土地註冊處查冊顯示，臧明華又再豪擲二千二百多萬元購入陳振聰與太太譚妙清聯名嘅麥當勞道百年順大廈單位，證明佢確係富婆一名。陳振聰在九三年以一千一百六十三萬元購入有關單位，如今售出賺咗一倍，淨袋一千一百多萬元。